Raaste Saaf Bataate Hain Ke Aap Aate Hain

Kalaam of Peer Naseer Uddin Naseer

Raaste Saaf Bataate Hain Ke Aap Aate Hain
Ham To Mehfil Ko Sajaate Hain Ke Aap Aate Hain.

Ahle Dil Geet Ye Gaate Hain Ke Aap Aate Hain
Aankh Reh Reh Ke Uthaate Hain Ke Aap Aate Hain.

Kehkashan, Raahguzar, Chand, Sitaare, Zarre
Sab Chamak Kar Ye Dikhaate Hain Ke Aap Aate Hain.

Apne Shahkaar Pe Khallaaq -E- Do Aalam Ko Hai Naaz
Ambiya Jhoomte Jaate Hain Ke Aap Aate Hain.

Unke Jalwon Se Nikharne Lagi Dil Ki Raunaq
Meri Taqdeer Jagaate Hain Ke Aap Aate Hain.

Ahle Imaan Ke Labon Par Hai Durood Aur Salaam
Yaume Milaad Manaate Hain Ke Aap Aate Hain.

Unki Aamad Ke Payaami Hai Saba Ke Jhonkay
Phool Shaakhon Ko Hilaate Hain Ke Aap Aate Hain.

Bol Baala Hua Haq Ka To Butaane Baatil
Khanaye Kaaba Se Jaate Hain Ke Aap Aate Hain.

Rahguzar Me Nazar Aane Lage Har Soo Jalwe
Zarre Reh Reh Ke Bataate Hain Ke Aap Aate Hain.

Marhaba Salle Alaa Ki Hain Sadayein Lab Par
Log Sadqe Hue Jaate Hain Ke Aap Aate Hain.

Chand Taaron Me Naseer Aaj Badi Halchal Hai
Yehi Aasaar Bataate Hain Ke Aap Aate Hain.