Ye Kehti Thi Ghar Ghar Me Jaa Kar Haleema

Ye Kehti Thi Ghar Ghar Me Jaa Kar Haleema

Ye Kehti Thi Ghar Ghar Me Jaa Kar Haleema
Mere Ghar Me Khairul Wara Aagaye Hain
Bade Aouj Par Hai Mera Ab Muqaddar
Mere Ghar Habeebe Khuda Aagaye Hain.

Uthi Chaarsu Rehmaton Ki Ghatayen
Mu-attar Mu-attar Hai Saari Fazayen
Khushi Me Ye Jibreel Naghme Sunaye
Wo Shafaye Rauze Jaza Aagaye Hain.

Muqarrab Hai Beshak Khaleejo Najee Bhi
Badi Shaan Waale Kaleemo Maseeh Bhi
Liye Arsh Ne Jinke Qadmon Ke Bose
Wo Ummi Laqab Mustafa Aagaye Hain.

Ye Zulmat Se Kehdo Ke Dere Uthale
Ke Hai Har Taraf Ab Ujaale Ujaale
Kaha Jinko Haq Ne Sirajam Muneera
Mere Ghar Wo Noore Khuda Aagaye Hain.

Ye Sunkar Saqi Aapka Aastana
Hai Daman Pasare Hue Sab Zamana
Nawason Ka Sadqa Nigahe Karam Ho
Tere Dar Pe Tere Gada Aagaye Hain.

Nakeerain Jab Meri Turbat Me Aakar
Kahenge Ziyarath Ka Mushda Sunakar
Utho Behre Tazeem Noor -Ul- Hasan Ab
Lahad Me Rasoole Khuda Aagaye Hain.