Kiya Jo Wirde Zubaan Tera Naam Ya Zahra

Kiya Jo Wirde Zubaan Tera Naam Ya Zahra

Kalaam of Peer Naseer Uddin Naseer

Kiya Jo Wirde Zubaan Tera Naam Ya Zahra
Ruka Kabhi Na Koi Mera Kaam Ya Zahra.

Malaika Hain Khade Ba Adab Tere Dar Par
Hai Ambiya Me Tera Ehteraam Ya Zahra.

Azal Se Likhdiya Khaliq Ne Daste Qudrath Se
Jabeene Waqt Pe Tera Dawaam Ya Zahra.

Maqaame Mariyam -O- Hawwa Bhi Hai Baja Lekin
Tera Maqaam Hai Tera Maqaam Ya Zahra.

Teri Zubaan Hai Ummul Kitaab Ki Kunji
Tera Kalaam Hai Ummul Kalaam Ya Zahra.

Hasan Se Leke Zahoor -E- Janabe Mehdi Tak
Tere Nasab Se Hain Ye Sab Imaam Ya Zahra.

Har Ek Saans Se Aati Thi Mustafa Ki Mehek
Teri Hayaath Pe Laakhon Salaam Ya Zahra.

Na Aayega Koi Duniya Me Ab Nabi Hokar
Chalega Ab Tere Baba Ka Naam Ya Zahra.

Mile Mujhe Bhi Hussain -O- Hasan Ke Sadqe Me
Chale Jo Hashr Me Kausar Ka Jaam Ya Zahra.

Ghuroob Hoke Bhi Ek Chandni Si Chor Gaya
Hussain Wo Tera Maahe Tamaam Ya Zahra.

Huzoor Aayen Lahad Me To Behre Isteqbaal
Uthun Mai Lete Hue Tera Naam Ya Zahra.

Zubaan Pe Zikr Hai Tera Nabi Ke Zikr Ke Saath
Durood Unpe Ho Tujhpar Salaam Ya Zahra.

Gyarveen Se Hamein Isliye Bhi Nisbath Hai
Ke Teri Aal Hain Gyaarah Imaam Ya Zahra.

Naseer Behre Saqa Kul Agar Ghalat Hai Nida
To Kyun Pukaarte Khairul Anaam Ya Zahra.