Pada Hoon Dar Pe Tere Misle Kaah Ya Zahra

Pada Hoon Dar Pe Tere Misle Kaah Ya Zahra

Kalaam of Peer Naseer Uddin Naseer

Pada Hoon Dar Pe Tere Misle Kaah Ya Zahra
Mile Faqeer Ko Khairath -E- Jaah Ya Zahra.

Hai Murtaza Tere Shauhar To Mustafa Baba
Zahe Ye Aouj -O- Sharaf Izzo Jaah Ya Zahra.

Mile Jo Iski Ijazath Mujhe Shariyath Se
To Tera Dar Ho Meri Sajda Gaah Ya Zahra.

Khuda Ko Maine Sada Laa Shareek Jaana Hai
Khuda Ke Saamne Rehna Gawaah Ya Zahra.

Hai Jinke Noor Se Ummat Ke Rozo Shab Raushan
Hasan Hussain Tere Mehromaah Ya Zahra.

Tere Hussain Ka Kirdaar Dekhkar Ab Tak
Pukaarte Hain Malak Waah Waah Ya Zahra.

Durood Tujhpe Ho Mizdaak -E- Bad'atun Minni
Salaam Tujhpe Ho Gayti Panah Ya Zahra.

Hai Teri Aal Se Peerane Peer Mohiuddin
Jo Auliya Ke Hue Sarbaraah Ya Zahra.

Bharun To Kaise Bharun Dam Teri Ghulaami Ka
Bohot Badi Hai Teri Bargaah Ya Zahra.

Kahan Tu Ek Najeeba Afeefa Paak Nazar
Kahan Mai Ek Aseere Gunaah Ya Zahra.

Tu Badshahe Do Aalam Ki Ek Shahzaadi
Mai Ek Ghareeb Teri Garde Raah Ya Zahra.

Ujad Chuka Hoon Ghame Zindagi Ke Haathon Se
Khada Hoon Dar Pe Ba Haale Tabaah Ya Zahra.

Hoon Maasiyath Ki Siyaahi Maley Hue Mu Par
Kise Dikhaun Ye Roohe Siyaah Ya Zahra.

Mai Wo Bura Hoon Magar Tera Wo Gharana Hai
Kiya Buron Se Bhi Jisne Nibaah Ya Zahra.

Bhari Hai Dar Se Hazaaron Ne Jholiyan Apni
Meri Taraf Bhi Karam Ki Nigaah Ya Zahra.

Na Pher Aaj Mujhe Apne Dar Se Tu Khaali
Ke Tere Baba Hain Shaahon Ke Shaah Ya Zahra.

Baroze Hashr Na Pursa Ho Jab Koi Uska
Mile Naseer Ko Teri Panaah Ya Zahra.