Ho Nahi Sakti Raqam Binte Shahe Bat'ha Ki Shaan

Kalaam of Peer Naseer Uddin Naseer

Ho Nahi Sakti Raqam Binte Shahe Bat'ha Ki Shaan
Kya Bayaan Ho Qatra -E- Nacheez Se Dariya Ki Shaan.

Ek Zarra Kya Ahaata Karsake Khursheed Ka
Ek Adna Kya Samajhsakta Hai Ek Aala Ki Shaan.

Hai Mere Peshe Nazar Uss Zaat Ka Zikre Buland
Past Hojaati Hai Jiske Saamne Duniya Ki Shaan.

Bad'atum Minni Kahen Jisko Rasoole Inso Jaan
Isse Badhke Aur Kya Ho Uss Durre Yakta Ki Shaan.

Jiski Aamad Par Khade Hon Khud Imaam - Ul- Ambiya
Dekhiye Chashme Nabuwwath Me Zara Zahra Ki Shaan.

Chaal Me Husne Khiraame Ahmadi Ka Baankpan
Waz Zuha Se Milti Jhulti Chehraye Zeba Ki Shaan.

Ahle Mehshar Jiski Aamad Par Rakhein Neechi Nazar
Kis Qadar Unchi Hai Uss Shahzaadi -E- Waala Ki Shaan.

Ye Khawateen -E- Jahane Nau Bhala Samjheingi Kya
Mariyam -O- Hawwa Se Poocho Zainabe Kubra Ki Shaan.

Hai Jahan Me Be Adeel -O- Be Misaal -O- Be Maseel
Zarb Haidar Ki Muhammad Ki Saqa Zahra Ki Shaan.

Jab Bani'n Binte Muhammad Walida Sibtain Ki
Chashme Insaan Me Dobala Hogayi Mamta Ki Shaan.

Marhaba Zahra Tera Zauje Giraami Bu Turaab
Khaak Me Jisne Milaadi Khaisaro Khisra Ki Shaan.

Baaqir -O- Shabbir -O- Shabbar Zainab -O- Zainul Ibaad
Marhaba Kya Aouj Par Hai Itrate Zahra Ki Shaan.

Wo To Tere Maah Paaron Ne Lagaaye Chaar Chaand
Warna Kya Karbal Ke Ek Tapte Hue Sehra Ki Shaan.

Sajda -E- Hairath Me Hai Ab Tak Jahane Saajdeen
Dekhkar Tere Pisar Ki Sajda -E- Oola Ki Shaan.

Jab Sawa Neze Pe Aajayega Suraj Munkiron
Uss Ghadi Tum Par Khulegi Chadare Zahra Ki Shaan.

Fatima Maa Hai Ussi Marde Jari Ki Aye Naseer
Lashkare Jarrar Par Haawi Thi Jis Tanha Ki Shaan.