Unke Andaaze Karam Unpe Wo Aana Dil Ka

Unke Andaaze Karam Unpe Wo Aana Dil Ka

Kalaam of Peer Naseer Uddin Naseer

Unke Andaaze Karam Unpe Wo Aana Dil Ka
Haaye Wo Waqt Wo Baatein Wo Lagana Dil Ka.

Naa Suna Usne Tawajju Se Fasana Dil Ka
Umr Guzri Hai Magar Dard Na Jaana Dil Ka.

Dillagi Dil Ki Lagi Banke Mita Deti Hai
Rog Dushman Ko Bhi Ya Rab Na Lagana Dil Ka.

Ek To Mere Muqaddar Ko Bigaada Usne
Aur Phir Uspe Ghazab Hans Ke Banana Dil Ka.

Mere Pehlu Me Nahi, Aap Ki Mutthi Me Nahi
Be Thikane Hain Bohot Din Se Thikana Dil Ka.

Wo Bhi Apne Na Hue Dil Bhi Gaya Haathon Se
Aise Aane Se To Behtar Tha Na Aana Dil Ka.

Khoob Hain Aap Bohot Khoob Magar Yaad Rahe
Zeb Deta Nahi Aison Ko Satana Dil Ka.

Be Jhijak Aake Milo Hans Ke Milaao Aankhein
Aao Ham Tumko Sikhate Hain Milaana Dil Ka.

Naqsh Bar Aab Nahi, Wehm Nahi Khwab Nahi
Aap Kyun Khel Samajhte Hain lagana Dil Ka.

Hasratein Khaak Hui Mitgaye Armaan Saare
Lutgaya Kooncha -E- Jaanan Me Khazana Dil Ka.

Le Chala Hai Mere Pehlu Se Basad Shouq Koi
Ab To Mumkin Hi Nahi Laut Ke Aana Dil Ka.

Unki Mehfil Me Naseer Unke Tabassum Ki Qasam
Dekhte Rehgaye Ham Haath Se Jaana Dil Ka.