Khusha Wo Din Harame Paak

Khusha Wo Din Harame Paak

Khusha Wo Din Harame Paak Ki Fazaon Me Tha
Zubaan Khamosh Thi Dil Mehvo Iltejaaon Me Tha.

Ghilaafe Khaanae Kaaba Tha Mere Haathon Me
Khuda Se Arzo Guzarish Ki Intehaon Me Tha.

Dare Karam Pe Sada Deraha Tha Ashkon Se
Jo Multazam Pakde The Mai Un Gadaon Me Tha.

Hateem Me Mere Sajdon Ki Kaifiyaat Thi Ajab
Jabeen Zameen Pe Thi Zehn Kehkashaon Me

Faza -E- Maghfirath Aasar Me Tha Dil Sarshaar
Mera Wujood Khuda Ke Karam Ki Chaaon Me Tha.

Tawaaf Karta Tha Parwanavaar Kaabe Ka
Jahane Arzo Sama Jaise Mere Paaon Me Tha.

Mujhe Yaqeen Hai Mai Phir Bulaya Jaaunga
Ke Ye Sawaal Bhi Shaamil Meri Duaon Me Tha.