Sifaat -O- Zaat Ka Wo Paikare Qudrath

Kalaam of Hazrath Khwaja Shouq Sahab

Sifaat -O- Zaat Ka Wo Paikare Qudrath Nishaan Tum Ho
Jahan Tum Ho Wahan Haq Hai Jahan Haq Hai Wahan Tum Ho.

Ba Shaane Laa Makane Jalwa Baare Har Makaan Tum Ho
Jahan Aawaz Do Mehsoos Hota Hai Wahan Tum Ho.

Tumhara Zikr Kalme Me Azaanon Me Namazon Me
Khuda Ke Aur Bande Ke Musalsal Darmiyan Tum Ho.

Kisi Ka Bhi Tasawwur Tak Nahi Hai Darmiyan To Ye
Tumhara Raazdaan Haq Aur Haq Ke Raazdaan Tum Ho.

Namoode Zindagi Tumse Shaoore Bandagi Tumse
Tumhe Jis Rukh Se Dekho Karwan Dar Karwan Tum Ho.

Shahood -O- Ayb Do Maujein Hain Jis Noore Mujarrad Ki
Wo Wajhe Kun Fakaan Tum Ho Wo Jaane Kun Fakaan Tum Ho.

Gunahgaar Ummati Hai Shouq Iska Zikr Hi Kya Hai
Malaaik Ambiya Sab Ghaib Hain Aaqa Jahan Tum Ho.