Kis Se Mumkin Hai Maqame Shahe Taiba Dekhna

Kalaam of Khwaja Shouq

Kis Se Mumkin Hai Maqame Shahe Taiba Dekhna
Jis Nazar Ki Jitni Had Hai Uska Utna Dekhna.

Jalwa Aur Nazron Me Doori Ho To Hoga Dekhna
Khud Nazar Jalwa Agar Banjaye To Kya Dekhna.

Azmate Aaqa Ka Qad Uncha Hai Kitna Dekhana
Umr Bhar Dekha Kayi Phir Bhi Na Aana Dekhna.

Har Qadam Aaqa Ka Hai Kya Fatihana Dekhna
Ahle Batil Ko Pada Har Waqt Neecha Dekhna.

Shamma Ho Fanoos Hai To Jagmagata Wo Bhi Hai
Kya Chupaye Noor Ko Tan Ka Libadah Dekhna.

Saahibe Laulak Dekhenge To Dekhenge Kise
Sash Jihat Ke Aaine Me Apna Chehra Dekhna.

Aastane Sahibe Qausain Hai Wo Aastan
Aaj Bhi Kauno Makaan Hai Sar Ba Sajda Dekhna.

Kayenath Ek Goshaye Daman Me Hai Simti Hui
Damane Sarkar Hai Kitna Kushada Dekhna.

Aaine Me Apna Munh To Dekhlo Pehle Zara
Sehl Hai Kya Chashme "Mazaagh-Al Basar" Ka Dekhna.

Phir Madina Dekhne Ki Dil Me Hasrath Reh Na Jaaye
Dekhna Kehte Hain Jisko Shouq Waisa Dekhna.