Shikwa Aur Jawab -E- Shikwa

Shikwa Aur Jawab -E- Shikwa

Kalaam of Allama Iqbal

SHIKWA - THE COMPLAINT

Kyun Ziyankaar Banun Sood Faramosh Rahun
Fikre Farda Na Karun Mehwe Ghame Dosh Rahun
Naale Bulbul Ke Sunoon Aur Hama Tan Gosh Rahun
Hamnawa Me Bhi Koi Gul Hoon Ki Khamosh Rahun
Jurrat Aamoz Meri Taabe Sukhan Hai Mujhko
Shikwa Allah Se Khaakam Ba Dahan Hai Mujhko.

Hai Baja Shewaye Tasleem Me Mash'hoor Hain Ham
Qissaye Dard Sunaate Hain Ke Majboor Hain Ham
Saaz Khamosh Hain Fariyaad Se Mamoor Hain Ham
Naala Aata Hai Agar Lab Pe To Mazoor Hain Ham
Aye Khuda Shikwaye Arbaabe Wafa Bhi Sunle
Khugare Hamd Se Thoda Sa Gila Bhi Sunle.

Thi To Maujood Azal Se Hi Teri Zaate Khadeem
Phool Tha Zebe Chaman Par Na Pareshan Thi Shameem
Shart Insaaf Hai Aye Sahibe Altaafe Ameem
Booe Gul Phailti Kis Tarha Jo Hoti Na Naseem
Hamko Jam'iyat -E- Khaatir Ye Pareshani Thi
Warna Ummat Tere Mehboob Ki Deewani Thi.

Hamse Pehle Tha Ajab Tere Jahan Ka Manzar
Kahin Masjood The Patthar Kahin Mabood Shajar
Khugare Paikare Mehsoos Thi Insaan Ki Nazar
Maanta Kyun Koi An Dekhe Khuda Ko Kyun Kar
Tujhko Malum Hai Leta Tha Koi Naam Tera
Quwwate Baazu -E- Muslim Ne Kiya Kaam Tera.

Basrahe The Yahin Saljook Bhi Toorani Bhi
Ahle Chin Cheen Me Iraan Me Sasaani Bhi
Isi Mamoor Me Aabad The Yunaani Bhi
Isi Duniya Me Yahoodi Bhi The Nasraani Bhi
Par Tere Naam Pe Talwaar Uthayi Kisne
Baat Jo Bigdi Hui Thi Wo Banayi Kisne.

Thi Hami Ek Tere Maarka Aaraon Me
Khushkiyon Me Kabhi Ladte Kabhi Dariyaon Me
Di Azaanein Kabhi Europe Ke Kaleesaon Me
Kabhi Africa Ke Tapte Hue Sehraon Me
Shaan Aankhon Me Na Jachti Thi Jahan Daaron Ki
Kalma Padhte The Hami Ghaav Me Talwaron Ki.

Ham Jo Jeete The To Jangon Ki Musibath Ke Liye
Aur Marte The Tere Naam Ki Azmath Ke Liye
Thi Na Kuch Teghzani Apni Hukumath Ke Liye
Sar Ba Kaf Phirte The Kya Dahr Me Daulat Ke Liye
Qaum Apni Jo Zar -O- Maal -E- Jahan Par Marti
Buth Faroshi Ke Ewaz Buth Shikani Kyun Karti.

Tal Na Sakte The Agar Jang Me Adjaate The
Paun Sheron Ke Bhi Maidan Se Ukhad Jaate The
Tujhse Sarkash Hua Koi To Bigad Jaate The
Tegh Kya Cheez Hai Ham Top Se Lad Jaate The
Naqsh Tauheed Ka Har Dil Pe Bithaya Hamne
Zere Khanjar Bhi Ye Paigham Sunaya Hamne.

Tu Hi Kehde Ke Ukhada Dare Khaibar Kisne
Shehr Qaisar Ka Jo Tha Usko Kiya Sar Kisne
Tode Maqlooq Khudawandon Ke Paikar Kisne
Kaat Kar Rakhdiye Kuffaar Ke Lashkar Kisne
Kisne Thanda Kiya Aatish Kada -E- Iran Ko
Kisne Phir Zinda Kiya Tazkiraye Yazdaan Ko.

Kaunsi Qaum Faqat Teri Talabgaar Hui
Aur Tere Liye Zehmath Kashe Paikaar Hui
Kiski Shamsheer Jahangeer Jahan Daar Hui
Kiski Takbeer Se Duniya Teri Bedaar Hui
Kiski Haibath Se Sanam Sehme Hue Rehte The
Mu Ke Bal Girke Huwallahu Ahad Kehte The.

Aagaya Ayn Ladayi Me Agar Waqte Namaz
Qibla Ru Hoke Zameen Bos Hui Qaume Hijaaz
Ek Hi Saff Me Khade Hogaye Mehmood -O- Ayaaz
Na Koi Banda Raha Aur Na Koi Banda Nawaz
Banda -O- Sahib -O- Mohtaaj -O- Ghani Ek Hue
Teri Sarkar Me Pohonche To Sabhi Ek Hue.

Mehfile Kauno Makaan Me Sahar -O- Shaam Phire
Mae -E- Tauheed Ko Lekar Sifat -E- Jaam Phire
Koh Me Dasht Me Lekar Tere Paigham Phire
Aur Malum Hai Tujhko Kabhi Nakaam Phire
Dasht To Dasht Hain Dariya Bhi Na Chore Hamne
Behle Zulmaath Me Dauda Diye Ghode Hamne.

Safhaye Dahr Se Baatil Ko Mitaya Hamne
Nau -E- Insaan Ko Ghulami Se Chudaya Hamne
Tere Kaabe Ko Jabeenon Se Basaya Hamne
Tere Quran Ko Seenon Se Lagaya Hamne
Phir Bhi Hamse Ye Gila Hai Ke Wafadaar Nahi
Ham Wafadaar Nahi Tu Bhi To Dildaar Nahi.

Ummatein Aur Bhi Hain Unme Gunahgaar Bhi Hain
Ijz Waale Bhi Hain Maste Mae Pindaar Bhi Hain
Unme Kaahil Bhi Hain Ghaafil Bhi Hai Hoshiyaar Bhi Hain
Sainkdon Hain Ke Tere Naam Se Bezaar Bhi Hain
Rehmatein Hain Tere Aghyaar Ke Kashanon Par
Barq Girti Hai To Bechaare Musalmanon Par.

Buth Sanam Khanon Me Kehte Hain Musalman Gaye
Hai Khushi Unko Ki Kaabe Ke Nigehbaan Gaye
Manzile Dahr Se Oonton Ke Hudi Khwan Gaye
Apni Baghlon Me Dabaye Hue Quran Gaye
Khandazan Kufr Hai Ehsaas Tujhe Hai Ke Nahi
Apni Tauheed Ka Kuch Paas Tujhe Hai Ke Nahi.

Ye Shikayath Nahi Hai Unke Khazane Mamoor
Nahi Mehfil Me Jinhe Baat Bhi Karne Ka Shaoor
Qehr To Ye Hai Ke Kafir Ko Mile Hoor -O- Qusoor
Aur Bechare Musalman Ko Faqat Waada -E- Hoor
Ab Wo Altaaf Nahi Ham Pe Inayaath Nahi
Baat Ye Kya Hai Ke Pehle Se Mudaraat Nahi.

Kyun Musalmanon Me Hai Daulate Duniya Nayaab
Teri Qudrath To Hai Wo Jiski Na Had Hai Na Hisaab
Tu Jo Chaahe To Uthe Seena -E- Sehra Se Habaab
Rah Rawe Dasht Ho Saili Zada -E- Mauje Saraab
Taane Aghyaar Hai Ruswaayi Hai Nadaari Hai
Kya Tere Naam Pe Marne Ka Ewaz Khwaari Hai.

Bani Aghyaar Ki Ab Chaahne Waali Duniya
Rehgayi Apne Liye Ek Khayaali Duniya
Ham To Ruqsath Hue Auron Ne Sambhali Duniya
Phir Na Kehna Hui Tauheed Se Khaali Duniya
Ham To Jeete Hain Ke Duniya Me Tera Naam Rahe
Kahin Mumkin Hai Ke Saaqi Na Rahe Jaam Rahe.

Teri Mehfil Bhi Gayi Chaahne Waale Bhi Gaye
Shab Ki Aanhein Bhi Gayi Subha Ke Naale Bhi Gaye
Dil Tujhe De Bhi Gaye Apna Sila Le Bhi Gaye
Aake Baithe Bhi Na The Aur Nikaale Bhi Gaye
Aaye Ushshaaq Gaye Waada -E- Farda Lekar
Ab Unhein Dhoond Charaghe Rukhe Zeba Lekar.

Darde Laila Bhi Wohi Qais Ka Pehlu Bhi Wohi
Najd Ke Dasht -O- Jabal Me Rame Aahu Bhi Wohi
Ishq Ka Dil Bhi Wohi Husn Ka Jaadu Bhi Wohi
Ummate Ahmade Mursal Bhi Wohi Tu Bhi Wohi
Phir Ye Aazurdagi -E- Ghair Sabab Kya Maani
Apne Shaidaon Pe Ye Chashme Ghazab Kya Maani.

Tujhko Chorda Ke Rasoole Arabi Ko Chorda
Buth Gari Pesh Kiya Buth Shikani Ko Chorda
Ishq Ko Ishq Ki Aashufta Sari Ko Chorda
Rasme Salman -O- Owaise Qarni Ko Chorda
Aag Takbeer Ki Seene Me Dabi Rakhte Hain
Zindagi Misle Bilaale Habshi Rakhte Hain.

Ishq Ki Khair Wo Pehli Si Adaa Bhi Na Sahi
Jaada Paimayi -E- Tasleem -O- Raza Bhi Na Sahi
Muztarib Dil Sifat -E- Qibla Numa Bhi Na Sahi
Aur Pabandi -E- Aayin -E- Wafa Bhi Na Sahi
Kabhi Hamse Kabhi Ghairon Se Shanasayi Hai
Baat Kehne Ki Nahi Tu Bhi To Har Jaayi Hai.

Sare Faraan Pe Kiya Deen Ko Kamil Tu Ne
Ek Ishaare Me Hazaaron Ke Liye Dil Tu Ne
Aatish Andoz Kiya Ishq Ka Haasil Tu Ne
Phook Di Garmi -E- Ruqsaar Se Mehfil Tu Ne
Aaj Kyun Seene Hamare Sharar Aabad Nahi
Ham Wohi Sokhta Samaan Hai Tujhe Yaad Nahi.

Waadi -E- Najd Me Wo Shore Salaasil Na Raha
Qais Deewana -E- Nazzara -E- Mehmil Na Raha
Hausle Wo Na Rahe Ham Na Rahe Dil Na Raha
Ghar Ye Ujda Hai Ke Tu Raunaqe Mehfil Na Raha
Aye Khusha'aan Roz Ki Aayi O Basad Naaz Aayi
Be Hijabana Sooe Mehfile Ma Baaz Aayi.

Baada Kash Ghair Hain Gulshan Me Labe Ju Baithe
Sunte Hain Jaam Ba Kaf Naghma -E- Ku Ku Baithe
Daur Hangamaye Gulzaar Se Yaksu Baithe
Tere Deewane Bhi Hain Muntazire Hu Baithe
Apne Parwanon Ko Phir Zauqe Khud Afrozi De
Barqe Derina Ko Farmane Jigar Sozi De.

Qaume Aawara Inaan Taab Hai Phir Sooe Hijaaz
Le Udaa Bulbule Be Par Ko Mazaaqe Parwaaz
Muztarib Baagh Ke Har Ghunche Me Hai Booe Niyaaz
Tu Zara Ched To De Tishna -E- Mizraab Hai Saaz
Naghme Betaab Hai Taaron Se Nikalne Ke Liye
Toor Muztar Hai Usi Aag Me Jalne Ke Liye.

Mushkilein Ummate Marhoom Ki Aasan Karde
Mor -E- Be Maaya Ko Ham Doshe Sulaiman Karde
Jins -E- Nayaab -E- Muhabbath Ko Phir Arzaan Karde
Hind Ke Dair Nasheenon Ko Mulsalman Karde
Ju -E- Khoon Mi Chikad Az Hasrate Deerina -E- Maa
Mi Tapad Naale Ba Nashtar Kade Seena -E- Maa.

Booe Gul Legayi Beroon -E- Chaman Raaze Chaman
Kya Qayamat Hai Ke Khud Phool Hai Ghammaze Chaman
Ahde Gul Khatm Hua Tootgaya Saaze Chaman
Udhgaye Daaliyon Se Zamzama Pardaaze Chaman
Ek Bulbul Hai Ke Hai Mehwe Tarannum Ab Tak
Uske Seene Me Hai Naghmon Ka Talaatum Ab Tak.

Qumriyan Shaaqe Sanobar Se Gurezaan Bhi Hui
Pattiyan Phool Ki Jhad Jhad Ke Pareshan Bhi Hui
Wo Purani Rawishein Baagh Ki Veeran Bhi Hui
Daaliyan Pairahe Barg Se Uryaan Bhi Hui
Qaid -E- Mausam Se Tabiyath Rahi Aazad Uski
Kaash Gulshan Me Samajhta Kabhi Fariyaad Uski.

Lutf Marne Me Hai Baaqi Na Maza Jeene Me
Kuch Maza Hai To Yehi Khoone Jigar Peene Me
Kitne Betaab Hai Jauhar Mere Aayine Me
Kis Qadar Jalwe Tadapte Hain Mere Seene Me
Iss Gulistaan Me Magar Dekhne Waale Hi Nahi
Daagh Jo Seene Me Rakhte Hon Wo Laale Bhi Nahi.

Chaak Iss Bulbule Tanha Ki Nawa Se Dil Hon
Jaagne Waale Isi Baang -E- Dara Se Dil Hon
Yaani Phir Zinda Naye Ahde Wafa Se Dil Hon
Phir Isi Baada -E- Deerina Ke Pyaase Dil Hon
Ajmi Khum Hai To Kya Mae To Hijaazi Hai Meri
Naghma Hindi Hai To Kya Lay To Hijaazi Hai Meri.
_______________________________________

JAWAB -E- SHIKWA
THE ANSWER TO THE COMPLAINT

Dil Se Jo Baat Nikalti Hai Asar Rakhti Hai
Par Nahi Taaqat -E- Parwaaz Magar Rakhti Hai
Khudsi -Ul- Asl Hai Rif'at Pe Nazar Rakhti Hai
Khaak Se Uthti Hai Gardun Pe Guzar Rakhti Hai
Ishq Tha Fitnagar -O- Sarkash -O- Chalaak Mera
Aasman Cheer Gaya Naala –E- Bebaak Mera.

Peer -E- Gardun Ne Kaha Sun Ke Kahin Hai Koi
Bole Saiyyare Sare Arshe Bareen Hai Koi
Chand Kehta Tha Nahi Ahle Zameen Hai Koi
Kehkashan Kehti Thi Poshida Yahin Hai Koi
Kuch Jo Samjha Mere Shikwa Ko To Rizwan Samjha
Mujhko Jannat Se Nikaala Hua Insaan Samjha.

Thi Farishton Ko Bhi Hairath Ke Ye Aawaz Hai Kya
Arsh Waalon Pe Bhi Khulta Nahi Ye Raaz Hai Kya
Taa Sare Arsh Bhi Insaan Ki Tagh -O- Taaz Hai Kya
Aagayi Khaak Ki Chutki Ko Bhi Parwaaz Hai Kya
Ghafil Aadab Se Sukkaan -E- Zameen Kaise Hain
Shokh -O- Gustakh Ye Pasti Ke Makeen Kaise Hain.

Iss Qadar Shokh Ke Allah Se Bhi Barham Hai
Tha Jo Masjood -E- Malaik Ye Wohi Aadam Hai
Aalame Kaif Hai Daana -E- Rumooze Kam Hai
Haan Magar Ijz Ke Asraar Se Na Mehram Hai
Naaz Hai Taqate Guftaar Pe Insaanon Ko
Baat Karne Ka Saleeqa Nahi Nadaanon Ko.

Aayi Aawaz Gham Angez Hai Afsana Tera
Ashke Betaab Se Labrez Hai Paimana Tera
Aasman Geer Hua Naraye Mastana Tera
Kis Qadar Shokh Zaban Hai Dile Deewana Tera
Shukr Shikwe Ko Kiya Husne Adaa Se Tu Ne
Ham Sukhan Kardiya Bandon Ko Khuda Se Tu Ne.

Ham To Maail Ba Karam Hain Koi Saail Hi Nahi
Raah Dikhlayein Kise Rah Rawe Manzil Hi Nahi
Tarbiyat Aam To Hai Jauhare Qabil Hi Nahi
Jis Se Tameer Ho Aadam Ki Ye Wo Gil Hi Nahi
Koi Qaabil Ho To Ham Shaanein Kayi Dete Hain
Dhoondne Waalon Ko Duniya Bhi Nayi Dete Hain.

Haath Be Zor Hain Ilhaad Se Dil Khugar Hain
Ummati Baais -E- Ruswayi -E- Paighambar Hain
Buth Shikan Uthgaye Baaqi Jo Rahe Buth Gar Hain
Tha Baraheem Pidar Aur Pisar Aazar Hain
Baada Aashaam Naye Baada Naya Khum Bhi Naye
Harame Kaaba Naya Buth Bhi Naye Tum Bhi Naye.

Wo Bhi Din The Ke Yehi Maaya -E- Ranaayi Tha
Naazishe Mausame Gul Laala -E- Sehraayi Tha
Jo Musalman Tha Allah Ka Saudaayi Tha
Kabhi Mehboob Tumhara Yehi Harjaayi Tha
Kisi Yakjaayi Se Ab Ahde Ghulami Karlo
Millate Ahmade Mursal Ko Maqami Karlo.

Kis Qadar Tum Pe Giran Subha Ki Bedaari Hai
Ham Se Kab Pyaar Hai Haan Neend Tumhe Pyaari Hai
Tab -E- Aazad Pe Qaide Ramazan Bhaari Hai
Tumhi Kehdo Yehi Aayine Wafadaari Hai
Qaum Mazhab Se Hai Mazhab Jo Nahi Tum Bhi Nahi
Jazbe Baaham Jo Nahi Mehfile Anjum Bhi Nahi.

Jinko Aata Nahi Duniya Me Koi Fan Tum Ho
Nahi Jis Qaum Ko Parwa -E- Nasheman Tum Ho
Bijliyan Jisme Hon Aasuda Wo Khirman Tum Ho
Bech Khaate Hain Jo Aslaaf Ke Madfan Tum Ho
Ho Niko Naam Jo Qabron Ki Tijarath Karke
Kya Na Bechoge Jo Miljayein Sanam Patthar Ke.

Safhaye Dahr Se Baatil Ko Mitaya Kisne
Nau -E- Insaan Ko Ghulami Se Chudaya Kisne
Mere Kaabe Ko Jabeenon Se Basaya Kisne
Mere Quran Ko Seenon Se Lagaya Kisne
The To Aaba Wo Tumhare Hi Magar Tum Kya Ho
Haath Par Haath Dhare Muntazir -E- Farda Ho.

Kya Kaha Behre Musalman Hai Faqat Waada -E- Hoor
Shikwa Bheja Bhi Kare Koi To Laazim Hai Shaoor
Adl Hai Faatir -E- Hasti Ka Azal Se Dastoor
Muslim Aayin Hua Kafir To Mile Hoor -O- Qusoor
Tum Me Hooron Ka Koi Chaahne Waala Hi Nahi
Jalwaye Toor To Maujood Hai Moosa Hi Nahi.

Manfa'at Ek Hai Is Qaum Ka Nuqsaan Bhi Ek
Ek Hi Sab Ka Nabi Deen Bhi Imaan Bhi Ek
Harame Paak Bhi Allah Bhi Quran Bhi Ek
Kuch Badi Baat Thi Hote Jo Musalman Bhi Ek
Firqa Bandi Hai Kahin Aur Kahin Zaatein Hain
Kya Zamane Me Panapne Ki Yehi Baatein Hain.

Kaun Hai Tareeke Aayine Rasoole Muqthar
Maslihath Waqt Ki Hai Kiske Amal Ka Miyaar
Kiski Aankhon Me Samaya Hai Shiaar -E- Aghyaar
Hogayi Kiski Nigah Tarze Salaf Se Bezaar
Qalb Me Soz Nahi Rooh Me Ehsaas Nahi
Kuch Bhi Paighame Muhammad Ka Tumhe Paas Nahi.

Jaake Hote Hain Masajid Me Saf'ara To Ghareeb
Zehmate Roza Jo Karte Hain Gawara To Ghareeb
Naam Leta Hai Agar Koi Hamara To Ghareeb
Parda Rakhta Hai Agar Koi Tumhara To Ghareeb
Umara Nashsha -E- Daulat Me Hai Ghafil Ham Se
Zinda Hai Millate Baiza Ghuraba Ke Dam Se.

Waaiz -E- Qaum Ki Wo Pukhta Khayali Na Rahi
Barqe Taabi Na Rahi Shola Maqaali Na Rahi
Rehgayi Rasme Azaan Roohe Bilaali Na Rahi
Falsafa Rehgaya Talqeen -E- Ghazali Na Rahi
Masjidein Marsiyan Khwan Hain Ki Namazi Na Rahe
Yaani Wo Sahibe Ausaafe Hijaazi Na Rahe.

Shor Hai Hogaye Duniya Se Musalman Nabood
Ham Ye Kehte Hain Ke The Bhi Kahin Muslim Maujood
Waza Me Tum Ho Nasaara To Tamaddun Me Hunood
Ye Musalman Hai Jinhein Dekh Ke Sharmayein Yahood
Yoon To Sayyad Bhi Ho Mirza Bhi Ho Afghaan Bhi Ho
Tum Sabhi Kuch Ho Bataao To Musalman Bhi Ho.

Dame Taqreer Thi Muslim Ki Sadaqat Bebaak
Adl Uska Tha Qawi Laus -E- Mara'at Se Paak
Shajare Fitrate Muslim Tha Haya Se Namnaak
Tha Shuja'at Me Wo Ek Hasti -E- Fauq -Ul- Idraak
Khud Gudaazi Name Kaifiyate Sahba Yash Bood
Khaali Az Khesh Shudan Surate Mina Yash Bood.

Har Musalman Rage Baatil Ke Liye Nashtar Tha
Uske Aayina -E- Hasti Me Amal Jauhar Tha
Jo Bharosa Tha Use Quwwate Baazu Par Tha
Hai Tumhe Maut Ka Dar Usko Khuda Ka Dar Tha
Baap Ka Ilm Na Bete Ko Agar Azbar Ho
Phir Pisar Qabile Miraas -E- Pidar Kyun Kar Ho.

Har Koi Mast -E- Mae Zauqe Tan Aasani Hai
Tum Musalman Ho Ye Andaze Musalmani Hai
Haidari Faqr Hai Na Daulate Usmani Hai
Tum Ko Aslaaf Se Kya Nisbate Roohani Hai
Wo Zamane Me Muazziz The Musalman Hokar
Aur Tum Khwaar Hue Taariqe Quran Hokar.

Tum Ho Aapas Me Ghazabnaak Wo Aapas Me Raheem
Tum Khatakaar -O- Khata Been Wo Khata Posh -O- Kareem
Chaahte Sab Hain Ke Hon Aouje Suraiyya Pe Muqeem
Pehle Waisa Koi Paida To Kare Qalbe Saleem
Takhte Faghfoor Bhi Unka Tha Sarire Kae Bhi
Yoon Hi Baatein Hai Ke Tum Me Wo Hamiyyath Hai Bhi.

Khud Khushi Shewa Tumhara Wo Ghaiyyur -O- Khuddaar
Tum Ukhuwwat Se Gurezaan Wo Ukhuwwat Pe Nisaar
Tum Ho Guftaar Sarapa Wo Sarapa Kirdaar
Tum Taraste Ho Kali Ko Wo Gulistan Ba Kanaar
Ab Talak Yaad Hai Qaumon Ko Hikayath Unki
Naqsh Hai Safhaye Hasti Pe Sadaqat Unki.

Misle Anjum Ufooqe Qaum Pe Raushan Bhi Hue
Bute Hindi Ki Muhabbath Me Barahman Bhi Hue
Shauqe Parwaaz Me Mahjoore Nasheman Bhi Hue
Be Amal The Hi Jawan Deen Se Bad Zan Bhi Hue
Inko Tehzeeb Ne Har Band Se Aazad Kiya
Laa Ke Kaabe Se Sanam Khwane Me Aabad Kiya.

Qais Zehmath Kashe Tanhayi -E- Sehra Na Rahe
Shehr Ki Khaaye Hawa Baad Ya Paimana Rahe
Wo To Deewana Hai Basti Me Rahe Ya Na Rahe
Ye Zaruri Hai Hijabe Rukhe Laila Na Rahe
Gila -E- Jaur Na Ho Shikwa -E- Bedaad Na Ho
Ishq Aazad Hai Kyun Husn Bhi Aazad Na Ho.

Ahde Nau Barq Hai Aatish Zane Har Khirman Hai
Aiman Isse Koi Sehra Na Koi Gulshan Hai
Iss Nayi Aag Ka Aqwam -E- Kuhan Eendhan Hai
Millate Khatme Rusul Shola Ba Pairaahan Hai
Aaj Bhi Ho Jo Baraheem Ka Imaan Paida
Aag Karsakti Hai Andaze Gulistan Paida.

Dekh Kar Range Chaman Ho Na Pareshan Maali
Kaukabe Ghuncha Se Shaakhein Hain Chamakne Waali
Khas -O- Khashaak Se Hota Hai Gulistan Khaali
Ghul Bar Andaaz Hai Khoon -E- Shohda Ki Laali
Rang Gardun Ka Zara Dekh To Unnaabi Hai
Ye Nikalte Hue Suraj Ki Ufuq Taabi Hai.

Ummatein Gulshane Hasti Me Samar Cheeda Bhi Hain
Aur Mehroome Samar Bhi Hain Khizar Deeda Bhi Hain
Sainkdon Nakhl Hain Kaahida Bhi Baleeda Bhi Hain
Sainkdon Batne Chaman Me Abhi Posheeda Bhi Hain
Nakhle Islam Namuna Hai Birau Mandi Ka
Phal Hai Ye Sainkdon Sadiyon Ki Chaman Bandi Ka.

Paak Hai Garde Watan Se Sare Daman Tera
Tu Wo Yousuf Hai Ke Har Misr Hai Kan'an Tera
Khafila Ho Na Sakega Kabhi Viraan Tera
Ghair Yak Baang -E- Dara Kuch Nahi Samaan Tera
Naqle Shama Asti -O- Dar Shola Rawad Resha -E- Tu
Aaqibat Soz Bawad Saaya -E- Andesha -E- Tu.

Tu Na Mitjayega Iran Ke Mitjaane Se
Nashsha -E- Mae Ko Ta'alluq Nahi Paimane Se
Hai Ayaan Yurishe Taataar Ke Afsaane Se
Pasbaan Milgaye Kaabe Ko Sanam Khane Se
Kashti -E- Haq Ka Zamane Me Sahara Tu Hai
Asre Nau Raat Hai Dhundla Sa Sitara Tu Hai.

Hai Jo Hangama Bapa Yurishe Bulghari Ka
Ghafilon Ke Liye Paigham Hai Bedaari Ka
Tu Samajhta Hai Ye Samaan Hai Dil Aazari Ka
Imtehan Hai Tere Isaar Ka Khuddari Ka
Kyun Hiraasan Hai Saheel -E- Faras -E- Aada Se
Noore Haq Bujh Na Sakega Nafas -E- Aada Se.

Chashme Aqwaam Se Maqfi Hai Haqiqat Teri
Hai Abhi Mehfile Hasti Ko Zarurath Teri
Zinda Rakhti Hai Zamane Ko Hararat Teri
Kaukabe Qismat -E- Imkaan Hai Khilafat Teri
Waqte Fursath Hai Kahan Kaam Abhi Baaqi Hai
Noore Tauheed Ka Itmaam Abhi Baaqi Hai.

Misle Bu Qaid Hai Ghunche Me Pareshan Hoja
Rakht Bar Dosh Hawa -E- Chamanistan Hoja
Hai Tunak Maya Tu Zarre Se Bayabaan Hoja
Naghma -E- Mauj Hai Hangama -E- Toofan Hoja
Quwwat -E- Ishq Se Har Past Ko Baala Karde
Dahr Me Isme Muhammad Se Ujaala Karde.

Ho Na Ye Phool To Bulbul Ka Tarannum Bhi Na Ho
Chamane Dahr Me Kaliyon Ka Tabassum Bhi Na Ho
Ye Na Saaqi Ho To Phir Mae Bhi Na Ho Khum Bhi Na Ho
Bazme Tauheed Bhi Duniya Me Na Ho Tum Bhi Na Ho
Khaima -E- Aflaak Ka Istaada Isi Naam Se Hai
Nabze Hasti Tapish Amada Isi Naam Se Hai.

Dasht Me Damane Kohsaar Me Maidan Me Hai
Bahr Me Mauj Ki Aaghosh Me Tufaan Me Hai
Cheen Ke Shehr Muraqash Ke Bayabaan Me Hai
Aur Posheeda Musalman Ke Imaan Me Hai
Chashme Aqwaam Ye Nazzara Abad Tak Dekhe
Rif'ate Shaane Rafa'na Laka Zikrak Dekhe.

Mardum -E- Chashme Zameen Yaani Wo Kaali Duniya
Wo Tumhare Shohda Paalne Waali Duniya
Garmi -E- Mehr Ki Parwarda Hilaali Duniya
Ishq Waale Jise Kehte Hain Bilaali Duniya
Tapish Andoz Hai Iss Naam Se Paare Ki Tarah
Ghota Zan Noor Me Hai Aankh Ke Taare Ki Tarah.

Aql Hai Teri Sipar Ishq Hai Shamsheer Teri
Mire Darwesh Khilafat Hai Jahangeer Teri
Maa Siwa Allah Ke Liye Aag Hai Takbeer Teri
Tu Musalman Ho To Taqdeer Hai Tadbeer Teri
Ki Muhammad Se Wafa Tu Ne To Ham Tere Hain
Ye Jahan Cheez Hai Kya Lauh -O- Qalam Tere Hain.