Taari Hai Ahle Jabr Pe Haibath Hussain Ki

Kalaam of Peer Naseer Uddin Naseer

Taari Hai Ahle Jabr Pe Haibath Hussain Ki
Allah Re Ye Shaane Jalaalath Hussain Ki.

Katwaa Ke Sar Gawahiye Tauheed Degaye
Be Misl Hai Jahan Me Shahadath Hussain Ki.

Soonghi Thi Leke Haath Me Dashte Balaa Ki Khaak
Nana Ke Saamne Thi Musibath Hussain Ki.

Karte Qubool Bay'ate Faasiq Wo Kis Tarha
Daste Muhammadi Pe Thi Bay'at Hussain Ki.

Peshe Nazar Husool Na Tha Takht -O- Taaj Ka
Thi Zulm Ke Khilaaf Baghawath Hussain Ki.

Narmi Wohi Khuloos Wohi Saadgi Wohi
Milti Thi Mustafa Se Tabiyath Hussain Ki.

Mehshar Me Ijtema Ka Ye Ehtemame Khaas
Shayad Dikhayi Jayegi Surath Hussain Ki.

Kal Bhi Dilon Pe Raaj Tha Zahra Ke Laal Ka
Hai Aaj Bhi Dilon Pe Hukoomat Hussain Ki.

Izhaare Harfe Haq Pe Hain Pehre Lage Hue
Mehsoos Horahi Hai Zarurath Hussain Ki.

Jo Unpe Mar Mita Wohi Thehrega Surkhuru
Mehshar Me Rang Layegi Nisbath Hussain Ki.

Rakhte Hain Apni Yaad Se Aabad Mera Dil
Hai Mujhpe Ye Naseer Inayath Hussain Ki.

Nikla Wo Zuljanaah Alam Ke Juloos Me
Karlo Naseer Badhke Ziyarath Hussain Ki.