Nabi Ke Hijr Me Mar Mar Ke
Nabi Ke Hijr Me Mar Mar Ke
Kalaam of Hazrath Zirak Sharfi Sahab
Nabi Ke Hijr Me Mar Mar Ke Jeeta Jaraha Hoon Mai
Fana Fillah Ki Manzil Ke Nazdeek Aaraha Hoon Mai.
Na Ro Aye Qalb -E- Muztar Jald Wo Taiba Bulaenge
Yehi Keh Keh Ke Aaqa Kab Se Dil Behlaraha Hoon Mai.
Khayale Gumbade Khazra Tere Qurban Hojaun
Tasawwur Ko Madine Ki Faza Me Paa Raha Hoon Mai.
Nabi Ke Gesu -E- Purkham Ka Haq Ko Waasta Dekar
Zara Uljhi Hui Taqdeer Ko Suljha Raha Hoon Mai.
Nakeeron Se Jo Ghabra Kar Pukara Ya Rasoolalllah
Mere Sarkar Ki Aawaz Aayi Aaraha Hoon Mai.
Nahi Zaade Safar To Kya Hua Zauqe Safar To Hai
Koi Kuch Bhi Kahe Zirak Madina Jaaraha Hoon Mai.