Hamari Duniya Badal Ke Rakhdi

Kalaam of Kamil

Hamari Duniya Badal Ke Rakhdi
Nazar Ka Milna Hua Bahana
Udhar Nigahein Mili Kisi Se
Idhar Ye Dil Bangaya Nishana.

Janabe Waaiz Hamari Lagzish
Hamare Hadh Tak Wabaal Hogi
Qadam Tumhare Jo Dagmagaye
To Dagmaga Jayega Zamana.

Jab Usne Dekha To Ji Uthe hum
Nazar Phirali To Mar Gaye Hum
Ajab Tamashe Ki Zindagi hai
Abhi Haqeeqat Abhi Fasana.

Shabaab Gulshan Nisaar Tumpar
Fida Hain Har Ek Bahaar Tumpar
Siyaah Gesu, Ghani Ghatayen
Nasheeli Aankhein Sharaab Khaana.

Kahan Ka Dil Kaisi Jaan Sahab
Yahan To Imaan Pe Aa Bani Hai
Ke Husn Khud Mustaqil Qayamat
Phir Uspe Andaaze Kaafirana.

Gunahgaron Pe Hasne Waalo
Na Yoon Kisi Ki Hasi Udaao
Na Jaane Hisse Me Kiske Aaye
Khuda Ki Rehmat Ka Shamiyana.

Kalaame Kamil Ki Shohraton Ka
Sabab Faqat Unse Rabt -O- Nisbat
Ghazal Ke Har Sher Par Hai Gehra
Chadha Hua Range Aashiqana.