Ya Hayyu Ya Qayyum
Ya Hayyu Ya Qayyum
Mahmood Hai Aisa Ke Teri Hamd Muhammad
Aala Hai Tu Itna Ke Tera Zikr Ali Hai
Ye Husn Hai Tera Ke Tu Hasnain Ka Rab Hai
Faatir Hai To Phir Fatima Zahra Ka Khuda Hai.
Sana Bashar Ke Liye Bashar Sana Ke Liye
Tamaam Hamd Sazawaar Hai Khuda Ke Liye
Ataa Ke Saamne Ya Rab Khata Ka Zikr Hi Kya
Ke Tu Ataa Ke Liye Hai Bashar Khata Ke Liye.
Kaunain Ka Masjood Hai Mabood Hai Tu
Har Shai Teri Shahid Hai Ke Mash'hood Hai Tu
Har Ek Ke Lab Par Hai Teri Hamdo Sana
Har Soz Me Har Saaz Me Maujood Hai Tu.
----------------
Ya Hayyu Ya Qayyum
Ya Hayyu Ya Qayyum. (x4)
Ya Raahimu Ya Rahman
Ya Aadilu Ya Daiyyan
Ya Haafizu Ya Sattar
Ya Waahidu Ya Ghaffar
Ya Maaliku Ya Razzaq
Tu Khaaliqe Har Khallaq
Har Raaz Tujhe Maloom
Har Raaz Tujhe Maloom.
--------
Be Misl Hai Tu Laraib
Tu Paak Hai Tu Be Aib
Tu Zeest Ka Hai Unwaan
Tu Saakhir -E- Har Udwaan
Teri Zaat Hai Azzawajal
Tu Har Mushkil Ka Hai
Har Simt Hai Teri Dhoom
Har Simt Hai Teri Dhoom
--------
Tanzeel Tera Paigham
Hai Khaas Tera In'aam
Hai Dard Ki Ye Ikseer
Imaan Iski Taseer
Hai Silsila -E- Ehsaas
Al Hamd Se Ta Wan Naas
Hai Saaf Iska Mafhoom
Hai Saaf Iska Mafhoom.
Girah...
Rehmath Ki Nigahon Ka Ishara Maango
Duniya Se Koi Shai Na Khudara Maango
Duniya Ki Wafa Jhoot Sahare Hain Faraib
Allah Se Allah Ka Sahara Maango.
Mansab Ki Karo Chaah Na Sarwath Maango
Tum Ahle Muhabbat Ho Muhabbath Maango
Har Haal Me Thaame Hue Damaan -E- Raza
Allah Se Allah Ki Rehmath Maango.
Kar Dil Ko Ataa Soze Dawaami Ya Rab
Har Saans Ho Rehmath Ki Payaami Ya Rab
Aurang -E- Shahi Ki Nahi Hajath Mujhko
Kaafi Hai Muhammad Ki Ghulami Ya Rab.
Sher...
Wo Nabiyon Ka Sardaar
Hai Aalam Ka Muqthar
Tu Saaz Hai Wo Awaaz
Tu Raaz Wo Mehram Raaz
Tu Lafz Hai Wo Farhang
Tu Haakim Wo Aurang
Tu Laazim Wo Malzoom
Tu Laazim Wo Malzoom.
-------
Mai Aajiz Khaak Bashar
Tu Maalik -E- Behro Bar
Mai Banda -E- Pur Taqseer
Tere Haath Meri Taqdeer
Mai Ahqar Teerah Khaak
Tu Waaris -E- Haft Aflaak
Tu Haakim Mai Mehkoom
Tu Haakim Mai Mehkoom.
Girah...
Aadat Hai Meri Had Se Guzarna Ya Rab
Aata Hi Nahi Mujhko Theherna Ya Rab
Harfa -E- Gada Maan -E- Karam Par Tere
Sharminda Sare Hashr Na Karna Ya Rab.
Sher...
Mai Naqsh Hoon Tu Naqqaash
Tu Mun'im Mai Khallaash
Mai Aabid Tu Mabood
Mai Sajid Tu Masjood
Mai Jism Hoon Aur Tu Dam
Tera Zikr Ilaaje Gham
Kyun Dil Ho Mera Maghmoom
Kyun Dil Ho Mera Maghmoom.
-------
Iss Daur Me Har Insaan
Be Behra Hai Aur Be Jaan
Hai Deeda -O- Dil Be Noor
Manzil Se Abhi Hai Door
Aise Me Mere Mabood
Hai Fazl Tera Maqsood
Rakh Isse Na Ab Mehroom
Rakh Isse Na Ab Mehroom
Girah...
Mai Kya Hoon Mai Kis Shai Ki Talafi Chahun
Kya Baat Mai Fitrat Ke Manafi Chahun
Kuch Paas Nahi Ashke Nadamat Ke Siwa
Kis Mu Se Gunahon Ki Muaafi Chahun.
Sher...
Teri Zaat Yame Ikraam
Mera Zarf Hai Zarfe Khaam
Tu Maalik Mai Majboor
Tu Noor Hai Aur Mai Toor
Ya Manzile Ins -O- Jaan
Kar Mujhpe Ye Ab Ehsaan
Mera Jaag Uthe Maqsoom
Mera Jaag Uthe Maqsoom.
Girah...
Mere Dile Gumraah Ne Maara Mujhko
Darkaar Hai Rehmath Ka Ishaara Mujhko
Sharminda Na Karna Sare Mehshar Ya Rab
Tere Hi Karam Ka Hai Sahara Mujhko.
Jaaun To Kahan Jaaun Tere Dar Ke Siwa
Taskeen Kahan Paaun Tere Dar Ke Siwa
Kaunain Pe Hai Tere Karam Ka Saaya
Daman Kahan Phailaun Tere Dar Ke Siwa.