Mere Malik Ka Ghar Aaqa Ka Ghar

Kalaam of Aouj Yaqubi

Mere Malik Ka Ghar Aaqa Ka Ghar Sarkar Ka Ghar Hai
Shaoor -E- Bandagi Sadqe Utar Sarkar Ka Ghar Hai.

Chale Aate Hain Aur Nalain Bhi Hain Paaye Aqdas Me
Ilahul Aalameen Kya Arsh Par Sarkar Ka Ghar Hai.

Suno Jibreel Sidrah Hai Haweli Ka Sara Pardah
Tumhe Shayad Nahi Malum Udhar Sarkar Ka Ghar Hai.

Ye Taiba Hai Saba Daarul Hukoomat Hai Do Aalam Ka
Dabe Qadmon Se Aahista Guzar Sarkar Ka Ghar Hai.

Madina Kya Hai Aur Arshe Mo'alla Kya Hai Sunlije
Idhar Sarkar Ka Daftar Udhar Sarkar Ka Ghar Hai.

Haram Ki Had Se Jab Nikle To Zaair Ko Batadena
Maqame Sajdaye Qalb -O- Nazar Sarkar Ka Ghar Hai.

Idhar Manzoor Hote Hi Udhar Maqbool Hoti Hai
Duaon Se Kaho Baabe Asar Sarkar Ka Ghar Hai.

Mera Kya Waasta Aye Aouj Darogeere Mehshar Se
Qayamat Me Mere Chupne Ka Ghar Sarkar Ka Ghar Hai.