Lahad Me Wo Surat Dikhayi Gayi Hai

Kalaam of Peer Naseer Uddin Naseer Sahab

Lahad Me Wo Surat Dikhayi Gayi Hai
Meri Soyi Qismat Jagayi Gayi Hai.

Nahi Tha Kisi Ko Jo Manzar Pe Laana
To Kyun Bazme Aalam Sajayi Gayi Hai.

Saba Se Na Ki Jaaye Kyun Kar Muhabbat
Bohot Unke Koonche Me Aayi Gayi Hai.

Wahan Thi Fida Misr Me Ek Zulekha
Yahan Sadqe Saari Khudayi Gayi Hai.

Ye Kya Kam Sanad Hai Meri Maghfirath Ki
Tere Dar Se Maiyyat Uthaayi Gayi Hai.

Gunahgaar Ummat Pe Rehmat Ki Daulat
Sare Hashr Khul Kar Lutayi Gayi Hai.

Sharaabe Tahoor Unke Daste Karam Se
Sare Hauze Kausar Pilaayi Gayi Hai.

Tahe Khaak Ho Shaad Kyun Kar Na Ummat
Nabi Ki Ziyarath Karayi Gayi Hai.

Kise Taab Nazara Jaali Ke Aage
Nazar Ehteraaman Jhukaayi Gayi Hai.

Lahad Se Naseer Ab Chalo Tum Bhi Uthkar
Unhe Dekhne Ko Khudaayi Gayi Hai.