Kauno Makaan Ki Itni Hi Kul Kayenath Hai

Kalaam of Hazrath Khwaja Shouq Sahab

Kauno Makaan Ki Itni Hi Kul Kayenath Hai
Noore Nabi Na Hoto Na Din Hai Na Raat Hai.

Jalwa Numa Ba Shaane Bashar Aine Zaat Hai
Khud Kayenath Saaz Hai Khud Kayenath Hai

Ek Sunnate Rasool Bhi Ab Tak Na Mar Saki
Kaisi Wafaat Ye To Musalsal Hayaath Hai.

Do Chaar Maujze Ho To Maane Bashar Koi
Poori Hayaath Silsilaye Maujzaat Hai.

Mumkin Nahi Kitabon Se Irfaane Mustafa
Faizan Aur Baat Hai Ilm Aur Baat Hai.

Misle Bashar Ko Dekh Ke Samjha Na Jasaka
Wo Kya Samajhme Aaye Jo Na Deeda Zaat Hai.

Kis Par Khuli Haqeeqat -E- Noore Muhammadi
Jitni Nazar Hai Jiski Bhi Utni Hi Baat Hai.

Din Raat Mil Rahi Hain Do Aalam Ko Nematein
Allah Deraha Hai Muhammad Ka Haath Hai.

Khaliq Bhi Unke Saath Hai Khalqat Bhi Unke Saath
Unke Waseele Se Hi Har Ek Ki Najaat Hai.

Sabit Hua "Ana Basharum Mislukum" Se Shouq
Parde Se Bahar Aake Bhi Parde Me Zaat Hai.