Imaane Ishqe Ahmade Muqthar Ke Baghair

Kalaam of Altaf Samdani

Imaane Ishqe Ahmade Muqthar Ke Baghair
Mumkin Nahi Ke Chath Rahe Deewar Ke Baghair.

Andaza Isse Kijiye Unke Muqaam Ka
Kalma Na Poora Hosaka Sarkar Ke Baghair.

Dono Jahan Me Chashme Baseerat Se Dekhiye
Kuch Bhi Nazar Na Aayega Sarkar Ke Baghair.

Sadqa Rasoole Paak Ke Kirdaar Hi Ka Hai
Baatil Jo Sar Nigoon Hua Talwaar Ke Baghair.

Ya Rab Qasam Hai Tujhko Tere Hi Jalaal Ki
Nikle Na Dam Huzoor Ke Deedar Ke Baghair.

Mumkin Nahi Sukoon Ki Daulat Hame Mile
Zikre Rasoole Sayyade Abraar Ke Baghair.

Altaf Arze Haal Zuban Se Na Kijiye
Zaahir Hai Sab Huzoor Pe Izhaar Ke Baghair.