Kuch To Ye Chishtiyath Ka Asar Hai

Kalaam of Ahmed Hambali Sahab

Kuch To Ye Chishtiyath Ka Asar Hai
Kuch Tabiyath Meri Manchali Hai
Raag Mera Hai Man Kunto Maula
Taal Par Raqs -E- Hubbe Ali Hai.

Naaraye Haidari Kya Laga Hai
Kharjiyon Ki Surath Jali Hai
Wajd Me Hai Ali Ka Fidaayi
Najd Me Machgayi Khalbali Hai.

Garche Baade Fataawa Chali Hai
Phir Bhi Honton Pe Naade Ali Hai
Karbala Ke Shaheedon Ke Sadqe
Har Bala Meri Isse Tali Hai.

Uski Marqad Mehekti Rahegi
Uski Surath Chamakti Rahegi
Gulshane Buturaabi Ki Mitti
Apne Chehre Pe Jisne Mali Hai.

Door Hain Jo Ali Ki Ataa Se
Unki Qismat Me Rehna Hai Pyaase
Unko Jaane Do Meri Balaa Se
Mai Bulaun Mujhe Kya Chali Hai.

Hai Jo Haasil Ali Ki Muhabbath
Mere Imaan Ki Hai Ye Alamath
Sab Ki Duniya Se Kya Mujhko Matlab
Meri Duniya To Phooli Phali Hai.

Mere Ajdaad -O- Aabaa -O- Bhaai
Sab Ke Sab Hain Ali Ke Fidaayi
Meri Fitrath Bhi Alhumdulillah
Unke Saanche Me Jaakar Dhali Hai.

Shaam -E- Hijrath Ne Wo Shaan Dikhayi
Zere Khanjar Bhi Wo Neend Aayi
Yoon Laga Jis Se Bistar Bana Hai
Boriya Hai Magar Maqmali Hai.

Khauf Kya Ho Use Ab Kisi Ka
Kaun Kar Payega Baal Beeka
Ummati Hai Jo Pyaare Nabi Ka
Jis Ke Palle Pe Maula Ali Hai.

Rang Laaya Asar Chashme Nam Ka
Aur Sitaara Muqaddar Ka Chamka
Sag Bana Hoon Mai Baabe Karam Ka
Aur Thikana Ali Ki Gali Hai.

Chashme Hairath Se Mat Dekhiyega
Sadqa Hasnain Ka Deejiyega
Ya Ali Ye Nahi Aur Kisi Ka
Aapka Ahmad -E- Hambali Hai.