Sab Se Badi Yehi To Fazilath Ali Ki Hai

Kalaam of Hazrath Badeshah Hussaini (Layeeq) R.a

Sab Se Badi Yehi To Fazilath Ali Ki Hai
Seerat Jo Hai Nabi Ki Wo Seerat Ali Ki Hai.

Jis Ilm Ke Husool Se Banta Hai Aadmi
Uske Liye Hamesha Wasaatat Ali Ki Hai.

Isko To Sahibaane Nazar Se Hi Puchiye
Kis Darja Be Misaal Futuwwath Ali Ki Hai.

Tareeki -E- Lahad Ka Nahi Koi Daghdagha
Raushan Jo Dil Me Shamme Muhabbath Ali Ki Hai.

Roze Jaza Ki Fikr Se Kya Usko Waasta
Haasil Jise Azal Se Ma'iyyath Ali Ki Hai.

Be Shub'ha Katrahi Hai Ibadath Me Zindagi
Jab Tak Nigaahe Shouq Me Surath Ali Ki Hai.

Jo Aashiqe Rasool Hai Wo Aashiqe Ali
Hubbe Nabi Ke Saath Muhabbath Ali Ki Hai.

Munh Se Nikal Hi Jaata Hai Mushkil Me Ya Ali
Har Daur Me Jahan Ko Zarurath Ali Ki Hai.

Maula Hamare Kiske Nahi Muqtada Layeeq
Har Ek Silsile Me Imaamat Ali Ki Hai.