Mai To Khud Unke Dar Ka Gada Hoon
Mai To Khud Unke Dar Ka Gada Hoon
Kalaam of Iqbal Azeem Sahab
Mai To Khud Unke Dar Ka Gada Hoon
Apne Aaqa Ko Mai Nazr Kya Doon
Ab To Aankhon Me Bhi Kuch Nahi Hai
Warna Qadmon Me Aankhein Bicha Doon.
Aane Waali Hai Hai Unki Sawari
Phool Naaton Ke Ghar Ghar Saja Doon
Mere Ghar Me Andhera Bohot Hai
Apni Palkon Pe Shamme Jala Doon.
Meri Jholi Me Kuch Bhi Nahi Hai
Mera Sarmaaya Hai To Yehi Hai
Apni Aankhon Ki Chaandi Baha Doon
Apne Maathe Ka Sona Luta Doon.
Mere Aansu Bohot Kheemti Hain
Inse Wabasta Hai Unki Yaadein
Inki Manzil Hai Khaake Madina
Ye Gauhar Yunhi Kaise Luta Doon.
Khafile Jaarahe Hain Madina
Aur Hasrath Se Mai Takraha Hoon
Ya Lipat Jaaun Qadmon Se Inke
Ya Qaza Ko Mai Apni Sada Doon.
Mai Faqat Aapko Jaanta Hoon
Aur Usi Dar Ko Pehchanta Hoon
Iss Andhere Me Kisko Pukarun
Aap Farmayen Kisko Sada Doon.
Meri Baqshish Ka Samaan Yehi Hai
Aur Dil Ka Bhi Armaan Yehi Hai
Ek Din Unki Khidmat Me Jaakar
Unki Naatein Unhi Ko Suna Doon.
Rauzae Paak Pesh -E- Nazar Hai
Saamne Mere Aaqa Ka Dar Hai
Mujhko Kya Kuch Nazar Aaraha Hai
Tumko Lafzon Me Kaise Bata Doon.
Be Nigahi Pe Meri Na Jaayein
Deedawar Mere Nazdeek Aayein
Mai Yahin Se Madina Dikha Doon
Dekhne Ka Saleeqa Bata Doon.
Mujhko Iqbal Nisbath Hai Unse
Jinka Har Lafz Jaane Sukhan Hai
Mai Jahan Naat Apni Suna Doon
Saari Mehfil Ki Mehfil Jaga Doon.