Hussain Husne Muhammad Ka Namuna Hai

Kalaam of Saifi

Hussain Husne Muhammad Ka Namuna Hai Jahan Bhar Me
Takallum Me Adaa Me Naaz Me Andaaz -O- Taiwar Me.

Hussain Ek Naam Hai Ek Qadr Hai Ek Nuqta -E- Haq Hai
Nazar Me Noor Me Manzoor Me Naazir Me Manzar Me.

Hussain Ek Gauhar -E- Nayaab Hai Jo Mil Nahi Sakta
Zameen Me Abr Neesaan Me Sadaf Me Ya Samandar Me.

Hussain Aasoodgi -E- Daaimi Hai Jiska Charcha Hai
Furaat -O- Salsabeel -O- Dajla -O- Tasneem -O- Kausar Me.

Hussain Ek Husn, Qad Khushbu Ke Jiska Zikr Rehta Hai
Gulaab -O- Laala -O- Nasreen -O- Shamshaad -O- Sanobar Me.

Hussain Ek Jaaiza Hai Ek Fasaan Hai Ek Kasoti Hai
Andhere Aur Ujaale, Haq Wo Baatil, Khair Aur Shar Me.

Hussain Ibne Ali Saifi Tere Haami -O- Rehbar Hain
Musibat Me Balaa Me Imtehaan Me Fikr Me Dar Me.