Zameen Se Leke Aasman Tak

Zameen Se Leke Aasman Tak

Zameen Se Leke Aasman Tak
Ali Ke Jhande Gade Hue Hain
Magar Raqeeban -E- Beqirad Hai
Jo Apni Zid Par Ade Hue Hain.

Wiladat Unki Khuda Ke Ghar Me
Shahadath Unki Khuda Ke Ghar Me
Jo Iss Haqiqath Se Munharif Hain
Wo Sab Fasaane Gade Hue Hain.

Ali Ki Surath Bhi Hai Karamat
Ali Ki Seerath Bhi Hai Karamat
Ali Qayamane Mustafa Ki
Faza Me Pal Kar Bade Hue Hain.

Agar Mayassar Ho Chashme Bina
To Aasmanon Ki Simt Dekho
Jahan Jahan Unka Naqshe Paa Hai
Wahan Sitaare Jade Hue Hain.

Ali Ki Khushbu -E- Marifath Se
Tamaam Aalam Mehek Raha Hai
Magar Wo Be Faiz Hai Ke Jinke
Dilon Pe Taale Pade Hue Hain.

Ali Ka Dushman Nabi Ka Dushman
Nabi Ka Dushman Khuda Ka Dushman
Ye Baat Hai Saamne Ki Lekin
Qirad Pe Parde Pade Hue Hain.

Ali Ka Rutba Ghatane Waalon
Ali Ka Tum Kya Bigaad Loge
Zameen Se Leke Aasman Tak
Ali Ke Jhande Gade Hue Hai.

Munafiqon Se Jo Ham Ne Poocha
Ke Kyun Nahi Zikre Maula Karte
Wo Bole Apni Zubaan Pe Chaale
Azal Ke Din Se Pade Hue Hain.