Saire Gulshan Kaun Dekhe Dashte Taiba

Saire Gulshan Kaun Dekhe Dashte Taiba Chord Kar
Sooe Jannat Kaun Jaaye Dar Tumhara Chord Kar.

Sar Guzashte Gham Kahoon Kis Se Tere Hote Hue
Kis Ke Dar Pe Jaaun Tera Aastana Chord Kar.

Mar Hi Jaaun Mai Agar Iss Dar Se Jaaun Do Qadam
Kya Bache Bimaare Gham Qurb -E- Maseeha Chord Kar.

Be Liqa -E- Yaar Unko Chain Aajata Agar
Baar Baar Aate Na Yoon Jibreel Sidrah Chord Kar.

Kaun Kehta Hain Dile Be Mudda'a Hai Khoob Cheez
Mai To Kaudi Ko Na Loon Unki Tamanna Chord Kar.

Baqshwana Mujhse Aasi Ka Rawa Hoga Kise
Kis Ke Daman Me Chupun Daman Tumhara Chord Kar.

Hashr Me Ek Ek Mu Jo Takte Phirte Hain Adu
Aafaton Me Phans Gaye Inka Sahara Chord Kar.

Mar Ke Jeete Hain Jo Unke Dar Pe Jaate Hain Hasan
Jee Ke Marte Hain Jo Aate Hain Madina Chord Kar.