Naqsh Me Kayenath Ke Noore Nabi Ka Rang Hai

Naqsh Me Kayenath Ke Noore Nabi Ka Rang Hai
Azmate Mustafai Par Khalq Tamaam Dang Hai.

Hai Mere Saath Har Khushi Khushiyon Me Ek Umang Hai
Unka Karam Jo Har Ghadi Jis Din Se Sang Sang Hai.

Ishqe Nabi Ke Jaam Se Maqmoor Ang Ang Hai
Nafs Ki Sarkashi Ki Ab Raahe Hayaath Tang Hai.

Zikre Rasoole Paak Se Dil Ki Safaayi Kijiye
Bughzo Hasad Fareb Ka Dhuljayega Jo Zang Hai.

Uski Har Ek Baat Hai Baais -E- Faqre Aadmi
Lutfo Karam Huzoor Ka Jis Aadmi Ke Sang Hai.

Fikr -O- Shaoor -O- Ilm -O- Fan Kitne Waseeh Hi Kyun Na Ho
Ummi Laqab Ke Saamne Sab Ka Hisaar Tang Hai.

Akbar Jamaale Zaat Hai Mere Nabi Ki Zaat Me
Misle Bashar Ka Roop Hai Haqqaniyath Ka Rang Hai.