Khoob Taqdeer -E- Falak Jaag Uthi Aaj Ki Raat

Kalaam of Ismail Qadeer Quadri Sahab

Khoob Taqdeer -E- Falak Jaag Uthi Aaj Ki Raat
Rif'aton Par Wo Sawari Jo Chali Aaj Ki Raat.

Saans Roke Hue Thaire Hain Adab Se Kaunain
Sair -E- Asra Ko Chale Mere Nabi Aaj Ki Raat.

Lan Taraani Ki Sada Jinke Liye Aati Thi
Pyaas Unke Bhi Tajassus Ki Bujhi Aaj Ki Raat.

Noor Se Noor Mila Aisa Mila Had Na Rahi
Aur Baaqi Na Rahi Koi Dui Aaj Ki Raat.

Aur Bhi Khush Hue Sarkare Do Aalam Sunkar
Goya Lehje Me Ali Ke Hai Ali Aaj Ki Raat

Hamatan Gosh Hai Sidra Ke Makeen Sidra Par
Aur Sawari Mere Aaqa Ki Chali Aaj Ki Raat.

Madhe Sarkar Me Gum Hoja Qadeer -E- Khasta
Ke Mubarak Hai Mubarak Hai Badi Aaj Ki Raat.