Adna Ghulam Hoon Mai Shahe Dastageer Ka

Kalaam of Hazrath Badeshah Hussaini (Layeeq) R.a

Adna Ghulam Hoon Mai Shahe Dastageer Ka
Hai Aastane Peer Pe Takiya Faqeer Ka.

Kehdunga Unse Hoon Shahe Baghdad Ka Gada
Hoga Guzar Jo Qabr Me Munkir Nakeer Ka.

Haan Bostaan -E- Ghouse Ka Mai Andleeb Hoon
Unka Hua Hai Naam Mere Ham Safeer Ka.

Us Se Ziyada Paoge Maangoge Jis Qadar
Khwane Karam Wasee'e Hai Peerane Peer Ka.

Haami Hai Jab Hamare Shahinshahe Auliya
Kya Zikr Hai Gunahe Sagheer -O- Kabeer Ka.

Farsh Aapka Tha Takhte Sulaimaan Ki Tarha
Allah Re Martaba Shahe Girdoon Sareer Ka.

Gardan Pe Har Wali Ke Na Kyun Paaye Naaz Ho
Kandhe Pe Jab Qadam Hai Basheer -O- Nazeer Ka

Sairaab Honge Hashr Me Kausar Ke Jaam Se
Jaari Jo Faize Aam Ho Peerane Peer Ka.

Duniya Ke Karobaar Se Matlab Nahi Layeeq
Ab Quadri Chaman Me Hai Bistar Faqeer Ka.