Nabi Aap Par Se Fida Jaano Maal
Nabi Aap Par Se Fida Jaano Maal
Kalaam of Hazrath Yahiya Pasha (Haaziq) R.a
Nabi Aap Par Se Fida Jaano Maal
Ye Ghar Baar Saara Ye Ehlo Ayaal.
Raseeli Wo Aankhein Wo Zulfe Siyaah
Wo Noorani Chehra Wo Husn -O- Jamaal.
Wo Abru Qameeda Jabeen -E- Buland
Fida Jin Pe Hote The Badr -O- Hilaal.
Kabhi Muskura Kar Idhar Dekhlo
Ke Qismath Ka Khul Jaaye Sab Mere Jaal.
Mai Qadmon Se Hoon Door Sarkar Ke
Mujhe Sab Se Badhkar Yehi Hai Malaal.
Mujhe Koi Pohonchade Sarkar Tak
Dua Dega Usko Mera Baal Baal.
Bas Ab Zuhd -O- Taqwe Ko Rehne Bhi Do
Maro Ishqe Hazrath Me Ye Hai Kamaal.
Na Aaram Shab Ko Na Din Ko Qaraar
Hua Hijr Me Ab To Jeena Muhaal.
Kahan Se Kahan Ishq Pohoncha Gaya
Kahan The Owais Aur Salman Bilaal.
Qayamath Me Haaziq Ko Bhoolein Na Aap
Rahe Iss Gunahgaar Ka Bhi Khayaal.