Chand Nikla Hai

Muhabbath Ka Inayath Ka Ataa Ka Chand Nikla Hai
Rabbiun Noor Me Fazle Khuda Ka Chand Nikla Hai.

Zubaan -O- Qalb Par Hain Aamade Sarkar Ke Naghme
Sadaye Marhaba Sad Marhaba Ka Chand Nikla Hai.

Farishte Leke Aaye Mushda -E- Milad Ke Parcham
Mubarak Ho Ke Shaahe Ambiya Ka Chand Nikla Hai.

Bohot Mehboob Hai d Ko Zikre Jameel Unka
Manaao Jashn Mehboobe Khuda Ka Chand Nikla Hai.

Zamane Ko Batado Mustafa Se Pyaar Hai Kitna
Bayaane Ishq Izhaare Wafa Ka Chand Nikla Hai.

Sitaare Ambiya Ke Sab Usi Jalwe Se Raushan Hain
Nabuwwat Ke Falak Par Mustafa Ka Chand Nikla Hai.

Khuda Ne Unko Bheja Rehmatullil Aalameen Karke
Har Ek Mayoos Dil Me Aasra Ka Chand Nikla Hai.

Habeeballah Ki Aamad Mubarak Ho Musalmanon
Ghamon Me Ek Naveed -E- Jaan Fiza Ka Chand Nikla Hai.

Fida Uss Chand Ke Upar Sabhi Mehro Maho Akhtar
Ke Takhleeqe Jahan Ke Muddua Ka Chand Nikla Hai.

Naya Koi Nabi Hargiz Na Unke Baad Aayega
Ke Khaatam Banke Mere Mustafa Ka Chand Nikla Hai.

Wohi Asle Nabuwwat Bhi Gule Khatme Nabuwwat Bhi
Sabhi Ke Baad Sab Se Ibteda Ka Chand Nikla Hai.

Jo Ghafil Hain Jo Bhatke Hain So Aayein Raahe Sunnat Par
Hidayath Ke Liye Sidqo Safa Ka Chand Nikla Hai.

Na Lautega Koi Khaali Na Rad Hogi Dua Koi
Zahe Qismat Adaaye Muddua Ka Chand Nikla Hai.

Sikhaya Tha Ali Ne Jo Sabaq Sahbaa Ke Maktab Me
Ussi Farze Muhabbat Ki Adaa Ka Chand Nikla Hai.

Tasalli Pagaye Bechain Dil Subhe Baharaan Se
Har Ek Mazloom -O- Bekas Ki Dua Ka Chand Nikla Hai.

Baraste Hain Karam Ke Phool Sab Ahle Muhabbat Par
Munafiq Jo Bhi Hai Uski Saza Ka Chand Nikla Hai.

Nabi Ke Baaghiyon Ko Hai Badi Shiddat Ka Ranjo Gham
Wafadaron Pe Rahat Ki Ziya Ka Chand Nikla Hai.

Waqare Qaum -O- Millat Eide Miladun Nabi Se Hai
Yaqeenan Shauqate Haq Ki Baqa Ka Chand Nikla Hai.

Mite Kufr -O- Zalalath Ke Andhere Jis Ki Aamad Se
Chalo Dekhein Ke Uss Noore Huda Ka Chand Nikla Hai.

Fareedi Likhraha Hai Naat Me Har Rang Ke Naghme
Qalam Khush Hai Ke Tauseef -O- Sana Ka Chand Nikla Hai.