Eidi Ataa Karein (Eid Special)

Ek Chashme Iltefaat Ki Eidi Ataa Karein
Apni Nawazishaat Ki Eidi Ataa Karein.

Jin Me Huzoor Aapki Seerat Ka Aks Ho
Mujhko Bhi Un Sifaat Ki Eidi Ataa Karein.

Insaniyath Hai Aaj Bhi Zaqmon Se Choor Choor
Ab Amne Kayenath Ki Eidi Ataa Karein.

Hamse Har Ek Kaam Bigadta Hi Jaaye Hai
Husne Muamlaat Ki Eidi Ataa Karein.

Jo Aapki Nigah Ki Thandak Hai Ya Nabi
Pabandi -E- Salaat Ki Eidi Ataa Karein.

Guzre Huzoor Aapke Dar Par Ma -E- Siyaam
Taiba Me Chand Raat Ki Eidi Ataa Karein.

Kuch Yoon Sawaar Dije Mera Lehja -E- Sukhan
Fan Ko Nayi Jihaath Ki Eidi Ataa Karein.

Sarwar Ki Maghfirat Ki Sanad Ho Jo Hashr Me
Aisi Bas Ek Naat Ki Eidi Ataa Karein.