Teri Yaad Hai Meri Bandagi

Mustaqil Daur Pe Jeene Ka Sahara Karlun
Peer Ke Tukdon Pe Taa Umr Guzara Karlun
Mere Allah Mujhe Aisi Nigahein Dede
Aayina Dekhun To Murshid Ka Nazara Karlun
Do Piyaali Bhar Ke De Saaqi Mae Gulfaam Ki
Ek Apne Naam Ki Aur Ek Allah Naam Ki
Bhejde Poori Tamanna Iss Dile Nakaam Ki.

Ghoonth Hi Pilwa Magar Joshe Tamanna Daal Kar
Mujhe Ek Qatra De Magar Qatre Me Dariya Daal Kar.

Tujhi Ko Takna Tujhi Me Sunna Tujhi Me Gum Hona
Tera Zikr Hai Ibadath Teri Yaad Bandagi Hai.

Teri Yaad Hai Meri Bandagi
Mera Kaaba Tera Khayaal Hai
Mujhe Khud Me Rab Ka Pata Mila
Ye Teri Nazar Ka Kamaal Hai.

Sare Kaaba Dil Jo Laraz Gaya
To Madina Aake Sukoon Mila
Tere Donon Roop Ajeeb Hain
Wo Jalaal Tha Ye Jamaal Hai.

Gira...

Kalaame Paak Poshida Hai Bismillah Ki Surat Me
Mila Paighame Haq Hamko Kalaamullah Ki Surat Me
Hai Zaate Lam Yazal Maujood Khalqullah Ki Surat Me
Khuda Duniya Me Aaya Hai Rasoolallah Ki Surat Me.

Tere Naqshe Paa Pe Rakhi Jabeen
Mujhe Fikre Dairo Haram Nahi
Hai Bade Maze Ki Ye Zindagi
Koi Khauf Hai Na Malaal Hai.

Mera Peer Mera Khuda Nahi
Magar Uske Qabze Me Kya Nahi
Shahe Ambiya Ka Hai Laadla
Wo Bade Gharane Ka Laal Hai.

Tere Dar Pe Hoon Mai Pada Hua
Teri Marzi Me Hai Meri Raza
Tu Nawazde Ya Bigaad De
Ye Tere Karam Ka Sawaal Hai.

Na Talab Hai Koi Na Muddua
Ke Naza Ke Waqt Mere Khuda
Mera Peer Ho Mere Rubaru
Mera Sirf Itna Sawaal Hai.

Tere Ishq Me Jo Ana Kaha
To Sabhi Ne Mujhko Bura Kaha
Mere Yaar Mai Ye Samajhgaya
Kisi Maulwi Ki Ye Chaal Hai.

Mera Peer Aali Maqaam Hai
Mai Hoon Muqtadi Wo Imaam Hai
Koi Hukm Uska Mai Taaldoon
Kahan Saif Meri Majaal Hai.

Teri Yaad Hai Meri Bandagi